ശങ്കരാഭരണം-ആദിതാളം
പല്ലവി

ഓടിവാ! കൃപയാം നദിയരികില്‍- നിന്‍റെ
മലിനത നീക്കാന്‍ പാപീ
ഓടിവാ കൃപയാം നദിയരികില്‍
ചരണങ്ങള്‍
1
തേടി നിന്നെ കാണ്മാനേറ്റം
വാടി വഴന്നവന്നുള്ളം-
ഓടിവന്നു പാടുകളങ്ങേറ്റു കുരിശില്‍
നേടി നിന്‍റെ രക്ഷ യേശു
മോടിയോടുയിര്‍ത്തു പിതാ-
വോടിയിരുന്നു മദ്ധ്യസ്ഥനാ-
യ്ക്കേണപോക്ഷിക്കുന്നുവേഗം- ഓടി
2
അശുദ്ധികളൊഴിച്ചു നിന്‍
അകൃത്യങ്ങളകറ്റീടാന്‍
വിശുദ്ധിയിന്നുറവയെത്തുറന്നമാര്‍വ്വില്‍
കുളിച്ചു നീ അനുദിനം
വെളിപ്പിച്ചങ്കിയെ പിന്നെ
കുടിച്ചീടില്‍ തടിച്ചു – നീ
വിശുദ്ധനായ് വളര്‍ന്നീടും- ഓടി
3
പരിശുദ്ധാത്മാവു നിന്‍റെ
മരണാവസ്ഥയെ കണ്‍ടു
കരളലിഞ്ഞരികില്‍ വന്നെടുത്തുനിന്നെ
തിരുജീവന്‍ ഊതി നിന്നില്‍
മറുരൂപമാക്കി നിന്നെ-
തിരുസ്നാനം നല്കിയവന്‍
പരിശുദ്ധനായ് നടത്തും- ഓടി
4
സത്യമാം തിരുവചനം
ശുദ്ധിവരുത്തിടും നിന്നെ
ശുദ്ധിയിന്‍ വഴിയില്‍ നടത്തും വചനം
നിത്യം നിന്‍റെ പാദങ്ങള്‍ക്കു
സത്യവെളിച്ചം തന്നിട്ടു
ശുദ്ധതയില്‍ ശുദ്ധസ്ഥല-
ത്തെത്തുവോളം തുണച്ചീടും- ഓടി
5
ശുദ്ധിയിന്നലങ്കാരത്തില്‍
ശുദ്ധിമാന്മാരേ! സ്തുതിപ്പിന്‍
ശുദ്ധതയില്‍ വസിക്കും യഹോവയെ-നിങ്ങള്‍
നിത്യം നിത്യം വളര്‍ന്നു നാം
ശുദ്ധതയില്‍ മുതിര്‍ന്നു പാ-
പത്തെ നശിപ്പിച്ചീടുകില്‍
ക്രിസ്തുവില്‍ ജീവിച്ചീടും നാം- ഓടി
(എം. മാത്തന്‍)